في بلادنا لا يوجد مثل هذه المشاكل التافهة لان بلادنا من الأخر متنظمة كويس فخلونا نتكلم عن البلاد الأخرى.... و في البلاد الأخرى لا يوجد نظام, لا ينطبق عليهم إلا لفظ واحد وهو بلاد الفوضى في هذه البلد هناك زحمة على وسائل المواصلات, فتجد الأتوبيس مائل الى جنبه بمعنى أصح ماشي على عجلتين بس. شكله نكته و انظر الى شكله لما يكون الناس بقى منتظراه على المحطة, و كلهم منتظرين نفس الأتوبيس وطبعاً ليهم حق لأنة اوتوبيس واحد إلي بيجي بس ,يجى الأتوبيس كلهم يجرو عليه يخبطوا او يضربوا بعض ولا يهمهم ست ماسكه طفل ولا حامل ولا عجوز ولا عندهم ريحه الدم و مش بس كده لأ دا كمان فى ناس بتنط من الشبابيك و اللى يطلع يحجز. بعد كل الفركيشه دى يطلع الاوتوبيس, لو حد شاف ست عجوزه او ست حامل او ست ماسكه طفل محدش يقوم ولا كأن هما هنا, ودى طبعا مشكله كبيره كل واحد ينزل محطه فى سلام و ان كانوا كلهم نازلين مع بعض يبقى عليه العوض ينزلوا فى نفس واحد من باب واحد.
هتقول ايه ما هو ده الشعب!!!!

نيجى بقى عند مشكله القطارات:
و انا هناك فى هذه البلده المليئة بالفوضى و هى طبعا مش مصر لأن مصر من الأخر متنظمة كويس, دخلت المحطة, زحمه شديدة و دى مافيهاش مشكله, دخلت شباك الحجز عقبال ما وصلت لقيت نفسي حافية رحت قولتلها لو سمحت عايزه تذكره قطر فرنساوي و دفعت ثمن التذكرة و ثمن التكييف,و جبت اكلى و ماية و دخلت القطر كل حاجه ميه ميه التكييف شغال وcool
المفروض إن القطر يطلع الساعة عشره صباحا طلع القطر الساعة عشره و نص قلت مش مشكله مفرقتش من نص ساعة القطر مشى اول ساعة و نصف و بعدين انقطع التكييف طبعا أضيقت جدا وبعد كده كبرت و طنشت و لحظه اول ما القطر وصل المحطة شغلوا التكييف علشان إلي يطلع بعدنا يلاقى التكييف شغال و كله تمام و برضو طنشت و كبرت زي كل الشعب, طلعت من المحطة وقفت تاكسي ولما ركبت التاكسي عرف إن أنا مش من هنا و أنا برده من البلد دي و طبعاً البلاد دي مش مصر لأن مصر من الأخر منظمة كويس.

و انا قاعدة على رصيف البحر لقيت عربيتين واقفين جنب الرصيف ,جنب إشارة ممنوع وقوف السيارات على رصيف البحر, و الونش ماشى لقى العربيتين واقفين فى مكان خطأ, كلبش الونش العربيتان و بعد كدة زمر الضابط من كلاكس العربية الأولى, وقف الراجل صاحب العربية مع الضابط اتكلموا مع بعض أكثر من نصف ساعة و فى الاخر طلع الراجل صاحب العربية فلوس و إداهم للضابط راح الضابط فك الكلبش من العربية. راح الضابط للعربية الأخرى و زمر من الكلاكس طلع الراجل بتاع العربية الثانية اتكلم الراجل مع الضابط خمس دقائق و بعدين مشى الضابط و ترك عربية الراجل مكلبشه علشان الراجل معهوش فلوس.
ألحمد لله إن البلد دى مش بلدنا و إن بلدنا متنظمة كويس.