راسلنا علي الايميل ده, و قول كل اللي في نفسك
MailE7na@yahoo.com

مـــحـــمد ســـعـيـــد

ورقة و قلم و فكرة منورة فوق دماغي و عينيا رايحة جاية في الورقة البيضاء و القلم بيلف في ايديا حيران, اكنني مش عارف اكتب ايه, مع اني واثق اني عايز اكتب, و محدد انا هكتب ايه, بس اللي انا فيه ده لأني بأجل دايما, بأجل الكتابه الي يوم مجهول, كأنني منتظر النتيجة قبل الامتحان, او مستني ارتوي من غير ما أشرب.

هداني ربي للكتابه, و ابتدأ القلم يتحرك, وعينيا تركز وراء القلم, و لقيت أول كلمه كتبتها بعد البسمله ( أنا ), وقفت للحظه اسأل نفسي انا بكتب ايه, هي وصلت بيا الانانية اني افكر اول ما افكر في نفسي؟؟, بس بعد كدة فهمت, فهمت ان ( انا ) ديه معناها ان البداية من عندي, مش استني حد تاني,اني لو حبيت اغير الناس ابتدي بنفسي , و لو حبيت افكر و اعمل يبقي بردة بنفسي,لأن الانتظار لن يحرك القطار .

و لأني مؤمن بأن الفكرة المستورة, زي الجسد المدفون, لا يعلم عنه غير الله, قررت ان اللي بكتبه الناس تقراه, و اللي بقوله الناس تسمعه, و قررت اني ما أدفنش نفسي تاني,و قررت اني اتكلم بصوت عالي, لأني كرهت الصوت الواطي, و عشان كده انا بكتب في المجله ديه, و نفسي انتم كمان تكتبوا, و توصلوا افكاركم, طلعوها متحجزوهاش, ما تكتبوش في كشكول و تخبوه, انشر اللي جواك قصاد غيرك, هتتقابلوا في مكان يمكن يكون بدايه للتغير, بدايه للنجاح, بدايه للتطوير . . . .

نــورهــان عـبـد الـوهـاب

“People feel lonely because they build Walls instead of Bridges” they say, in my life I learned that building those bridges is the best way to communicate with each other and achieve progress. In this magazine we want to break all the walls and barriers, express our young thoughts and share our feelings to build bridges of change. Lets make a difference in our community by saying our words, and saying it OUT LOUD!!

يــاســمـيــن اســامـة

اول ما قلت أحب, حبيت مصر بلدي اللي اتربيت فيها,و من حبي فيها نسيت عيوبها و نفسي تكون احسن و احسن... وأنا بنت بسيطة جدا , بحب الصراحة و متفائلة جدا , بحب الرسم جدا جدا و نفسي ابقي فنانه مشهوره و ليا معارض في كل مكان, عندي أحلام كتيرة نفسي أحققها فأنا طموحة لأبعد حدود, حبيت اني اكتب عشان اطلع اللي جوايا,مع اني عمري ما كتبت في حياتي, عايزة الناس تشوف دماغي فيها ايه, و أعرف الناس في دماغها ايه, و حبيت اني لما اكتب, اكتب للشباب و عن الشباب, لأني منهم و حاسه بيهم و بمشاكلهم, نفسي أقدر اساعدهم ولو بكلمه في سطر.
و انا بدعوكم, تعالوا شوفوا مجله شبابية 100%, افكار و اراء جديدة و جريئة من شباب مصري زيكم يا بخت البلد بيهم, عندهم طموح و هيحققوا هدفهم, معانا هتقدر تفضفض و تطلع اللي جواك, و اوعي تخاف او تتكسف, و نوعدك انك هتلأقي كل جديد و مختلف...

ســـــاره يــوســـف

كل سنة و انت طيبين و رمضان كريم.. عندي ليكم كلام كتير قوي بس محتارة ابدأ بايه!!, متهيألي دايما كل حاجة بتكون صعبه في البداية, بس لما بنبدأ بتدوووس (المهم اننا نبدأ, مش كده ولا ايه؟؟؟), خلوني ابدأ و أعرفكم علي نفسي, أنا واحده من جيلكم, الجيل اللي عامل مشكلة ده و اللي الناس احتارت فيه و اختلفت عليه, شوية يقولوا الجيل الجديد ده بايظ و مش نافع, و شوية يقولوا ابدا يا جماعة ده جيل مكافح بس ملقاش حد ياخد بايده, ناس تقول ده جيل تافه ( احنا ماكوناش كده زمان دول مش فالحين غير في الغناء و الرقص), و ناس تانية تقول لا لا يا جماعة دا جيل زكي, ده جيل الكمبيوتر و النت.
و الحقيقة اننا جيل زي اي جيل, عندنا احلام عايزين نحققها, احلامنا بسيطه و طموحاتنا عالية و ايماننا بربنا كبير... فينا الحلو و الوحش, حتي الوحش مننا جواه حاجات كتير حلوة..

مشكلتنا اننا مش لاقيين الفرصة عشان نعبر عن نفسنا صح, يمكن العيب فينا ؟!, ليه نستنا الفرصة ليه ماندورش عليها, صحيح البداية دايما صعبه, بس اول ما نبدأ الصعب هيبقي سهل. . .علشان كده احنا قررنا نكتب, نكتبلكم, نكتب عننا و عنكم, نحكي معاكم و نسمع منكم, نتواصل ... نحلم سوا ... نساعد بعض علي تحقيق حلمنا, و الاهم من كل ده اننا نعبر عن نفسنا بحرية بدون رقابة..
المجلة ديه هتكون مجلتنا كلنا, موضوعاتنا هي كلامنا, صحيح هوا طراطيش كلام بس صدقوني هيكون احلي كلام... عارفين ليه ؟؟؟
لأنه من القلب للقلب...بصدق و حب

الاء أحـــمــــد

الاء أحمد, 13 سنه, رايحة أولي اعدادي, بصراحة هي معرفتش تكتب عن نفسها, او مكانش عندها وقت, عشان هي مبتجيش في رمضان, و هي و اختها و اخوها بيحضروا رمضان في البيت, و كمان عشان الدراسة علي الابواب فلازم تجهز نفسها... بس أنا سمحت لنفسي أكتب عنها
هي شخصية لذيذة جدا, تشوفها تفتكرها كبيرة عن سنها من شقاوتها و حركتها الكتير, و عقلها اللي اكبر من سنها, بتكلم في كل حاجة, و ثقافتها عاليه جدا, هتتفاجئوا من كتاباتها و ارائها, و ان شاء الله قريب هي هتتكلم عن نفسها, و تقولكم بنفسها, هي بتكتب ليه!!...

نــــورا ســعـــيـــد

تمضى الحياة بين الاخرين فنشاركهم اهتمامتهم وهمومهم واحلامهم, وفي احيان اخري نبقي مع خواطرنا واحلامنا, وقد يشعر الانسان بالوحدة رغم انه بين زحام البشر حين يفتقد التعاطف الحقيقى والمشاركة الصادقة ممن حوله... لذلك ادعوكم للمشاركة معا في افكارنا واحلامنا ومشاكلنا لاننا نعيش في هذه الحياة مرة واحدة فقط فلنجعلها معا افضل حياة.

مــــحــــمــود شــعـــبــان