|
|
|
||
|
|
العدد الخامس - الخميس 15/11/2007
 لو شفت مظاهرة يا حبيبي ملكش دعوة بيها و خليك في حالك...مالنا احنا بالسياسة انت تخلص  جامعتك و بعدين لو عاوز تتكلم في السياسة و الحاجات دي انت حر...يابني امشى جنب الحيط انا و ابوك مش بتوع مشاكل و طول عمرنا في حالنا....ده جزء صغنووون خالص من الكلام اللي اي واحد فكر مجرد التفكير يعني انه يفهم لعبة السياسة...الكلام اللي بيسمعه من الست الوالدة او السيد الوالد....مش عارفة ليه يعني.... ارحمونا من الحيطة و المشي جنبها...سيبونا نفهم شوية و نعبر عن نفسنا...مبقلش نمشي في مظاهرات...بقول بس نفهم اللي بيحصل و منبقاش مجرد بني ادم عاوز يعيش و السلام و بعد 10 سنين نبقى موظفين بنرجع ماسكين الجرنان في ايد و البطيخة في الايد التانية... فيها ايه يعني لو حاولنا نفهم و نفكر و نسمع...مبقلش روح انضم لحزب و لا شارك في مظاهرة...بقول نفهم بس...بس يظهر حتى الفهم حرم زي مابيقولوا....اول ما يظهر على حضرتك بوادر حب المعرفة يبقى بس خلاص الحق يا جدع الحق ياعم انت هتروح في داهية...و تلاقي مامتك عاملة مناحة في البيت و الواد كان زى الفل غيرش بس شوية العيال اللي اتلموا عليه و لعبوا في دماغه...قال يعني قالولوا تعالى نلفلنا سجارتين...و تلاقي الدكاترة في الجامعة يقولولك المادة 79 من الدستور بتمنع السياسة جوه الجامعة...و صحابك بقى يقولولك ياعم فكك من الكلام اللي يودي في داهية ده و خليك في المفيد شفت البت سوسو لابسة ايه النهاردة.... كان عندنا دكتور زمان قالنا كلمة حلوة جدا...قال: "ساعات الانسان من كتر تعوده على وجود تابوهات معينة بقى يحط لنفسه تابوهات اكتر مش موجودة اصلا"...يعني احنا من كتر ماتعودنا على تابوهات كانت موجودة قبل كده بقى عندنا اعتقاد ان مجرد التفكير في السياسة او الكلام فيها يودي في داهية و ده مش دايما يعني صح... لو كان الكلام ده صح امال كل السياسيين الكبار اللي موجودين دلوقتي جم ازاى...مش بقول عن بس اللي مع الحكومة...فيه كمان معارضة و اسماء مشهورة جدا و معارضة و موجودين.... و بعدين انا مش بقلك يا اخي ابقى سياسي كبير لما تكبر انا بقلك بس حاول تفهم الليلة ماشية ازاى...زي ماحضرتك بتتابع الاهلي لما بيروح اليابان و تشجعه و تفرح لما اللاعيبة يكسبوا كام مليون...لا انت هتلعب كورة في يوم من الايام و لا اللاعيبة هيدوك فلوس من اللي بيكسبوها يبقى ايه فايدة معرفتك بالكورة...حب استطلاع؟؟...طيب ما تستطلع مجالات تانية يا اخي غير الكورة...ده انت عجيب اوى اسأل و افهم و فكر و اعملك رأي مستقل و ملكش دعوة بكلام حد ...قولهم انك حر....و متخفش من حاجة...و انسى موضوع المشي جنب الحيطة ده خالص....زي ما بتسمع كلام مامتك من ودن و تخرجه من التانية اعمل الحوار ده مع الموضوع ده كمان...مش لازم تعمل عم المؤدب اللي مش بيكسر كلام مامته....مامتك خايفة عليك مقلناش حاجة بس برده هي مزوداها حبتين.... عن اذنكوا بقى عشان ماما بتنادي عليا هلحقها قبل ماتشوف الكلام ده و تقوللي خليكي في حالك و تديني محاضرة الحيطة....سلام ...Youmna YasSer |
||||||||||||||||
|
|
||||||||||||||||
|
 |
|
الـــغـــلاف احـنـا الـشبـاب كـلام جـمـيــل مــصــر الـبـلـد فـي اللعـبـة فــــي الــفــن مـــع الــلــه Banat X Banat في الملعب ولاد مــصــر كلام ميتنسيش English |
|
|
|
كــلـمـنـا |
|
|
|
|
|
|
