هتعمل ايه في رمضان؟؟..مفيش حد بشوفه الا لما اسأله السؤال ده...زمايلي اصحابي قرايبي جيراني حتى الناس اللي معرفمهش أوى, اول ما اتكلم معاهم ..ازيكم عاملين ايه هتعملوا ايه في رمضان..و من خبرتي الطويلة في السؤال ده يعني بقالي حوالي 3 رمضان بسأله بقيت عارفة من منظر الناس هما هيقولوا ايه بس برده بسأله رخامة يعني..و بعيدا عن الاجابة النموذجية بتاعة طبعا مش هذاكر و انسي الكلية خالص فيه اجابات تانية و هي مش بتختلف اوى عن بعض...يعني دايما بتكون... هشوف عيلتي يا اما عازمين او معزومين..هختم المصحف..هصلي التراويح..هسهر بالليل مع اصحابي..هتابع المسلسلات..هروح خيمة مش عارف فين بيقولوا حماقي هيغني فيها..هعمل ايه يعني هتنيل في البيت انتى مش حاسة يابنتي اول اسبوع بيكون عامل ازاى من غير السجاير انتى مش عايشة في الدنيا و لا ايه..

و واحد تاني متفائل يقول انا هبطل السجاير خالص..بصراحة بابايا من النوع المتفائل ده و هو خبرة في الموضوع ده تقريبا بقاله 15 رمضان بيبطلها...واحدة تانية تقوللي انتى هابلة يابنتي مش هعرف اشوف محمد طبعا أصله بيقوللي مينفعش نتقابل في رمضان طالعلي في دور الشيخ دلوقتي.. و طبعا الناس المخطوبين جديد يقولولك حماتي عزمانى رمضان كله..و لو كنتوا زيي هتقولوا هناكل طبعا أصل ده الشهر الوحيد اللي بنعرف ناكل كل اللي نفسنا فيه على الفطار..


طيب حضرتك سألت نفسك قبل كده انت حضرت كام رمضان؟؟
انا عن نفسي حضرت 20 رمضان... عندي 20 سنة و حضرت فيها 20 رمضان بس...يعني من 20 سنة فيه سنة و 8 شهور بالظبط...مش كتير صح...و مع انهم مش كتير في ناس كتير بتستهبل و تفتكر انها لو احترمت نفسها في رمضان يبقى خلاص عملت اللي عليها..انت متخيل اللي بتطلبه...عاوز سنة و 8 شهور يغفرولك 20 سنة...و ياريت تيجي على قد كده..لا ده فيه ناس كمان مش فارقة معاها رمضان ده خالص...رمضان بالنسبة لها السهر في الخيم و الفرجة على المسلسلات و الحرمان من السجاير و الخروجات الصباحية و...دول بقى من العشرين و لا كام سنة اللي عايشاهم معملتش فيهم حاجة خالص...طيب تعالى نحسبها مع بعض..
لو اتكلمنا عن السجاير اللي بتخليك مش طايق نفسك في رمضان طيب ماتبطلها يا اخي دي حتى مضرة بالصحة..انت تقبل انك تجيب قزازة فليت و تشربها؟..انا مش بهيس...الفليت بيموت..طيب ما السجاير بتموت برده..اشمعنى بتشربها و مش بتشرب الفليت...متفرقش كتير..
طيب المسلسلات بقى...انا مش بقول انها حرام و لا حلال دي مش قضيتنا دلوقتي..بس المسلسلات بتكون كتير جدا جدا في رمضان..السنة اللي فاتت كنت حسبتهم لاقيتهم حاجة و تلاتين..انا مش هقلك متتفرجش لا اتفرج بس انا عن نفسي بشوفهم بعد رمضان ..اصلهم بيتعادوا طبعا..لكن لما بيتعادوا بيتعادوا بعيد عن بعض حتى عشان تتفرج عليهم براحتك و مايدخلوش في بعض..يبقى مشكلة المسلسلات اتحلت..تابع واحد و لا اتنين عشان تركز فيهم و الباقيين كملهم بعد رمضان..بالطريقة دي مش هتلاقي نفسك ملزوق بغرا قدام التلفزيون..
نيجي للسهر بقى و الخيم...لو انت من الناس اللي بيسهروا هناك تبقى انت اصلا متعود على السهر بره و الخروجات صح؟؟ طيب ايه اللي زنق حضرتك تخرج في رمضان...احنا حسبناها من شوية لو عندك 20 سنة هتلاقي رمضان مجاش غير سنة و 8 شهور بالظبط...يعني قدامك اكتر من 18 سنة تانيين...مش قادر يعني تستحمل شوية ما انت بتخرج كل يوم يا اخي قدامك 18 سنة بحالهم مش عاجبينك يعني..ده غير ان جو الخيم بعيدا برده عن الحرمانية بيكون زحمة و كل الفنادق بتستغلك و انت زي العبيط بتدفع الفلوس الضعف و الضعفين طيب ليه...ما انت اولى بفلوسك..انا عن نفسي مش بحب حد يستكردني بس مش عافة ايه ظروف حضرتك..
في حاجات كتير بنعملها بتخلينا مش فاضيين نستمتع بجمال رمضان..تلاقيك اول الشهر تقول انا هلتزم و الحوارات دي و يعدين تلاقي في مسلسل كويس وراه خروجة وراه مش عارف ايه و بسرعة بسرعة يخلص رمضان و تقول معلش تتعوض رمضان اللي جاي...حضرتك ضامن ان يبقى فيه رمضان جي..انا عن نفسي مش ضامنة..تخيل لو ده اخر رمضان تقضيه هتعمل فيه ايه؟؟؟ تحب يكون اخر رمضان يعدي عليك تقضيه في حوار المسلسلات و السهر و لا تقضيه و انت بتدعي ربنا و تقربله؟؟
طولت عليك؟ انا عارفة.. بس خلاص همشي..باي...صحيح نسيت اسألك...هتعمل ايه في رمضاااان؟؟؟