كلام كتير بنسمعه علي الحضارة المصرية, و عن التطور اللي وصل اليه الفراعنة في عهود مضت, و عن ازدهار مصر في عصر محمد علي, و انتعاش اقتصاد البلاد في فترات من الزمن, و ازدهارات و انتصارات شهدتها مصر في الازمان المختلفة..

بس لو جينا نفكر شوية و نحلل التاريخ, هنلاقي ان عصور الازدهار و عصور الانتكاسات شهدتها مصر الدولة مش مصر الشعب, فشعب مصر علي طول غلبان و فقير و مش لاقي ياكل, و طول عمره مقهور و ضعيف, و عمره ما كان رائد و صاحب فكر او ريادة – الا طبعا بعض من الفلتات امثال نجيب محفوظ و زويل و غيرهم -, و علي طول الطريق كان الشعب تحت رحمه الحكومة و كانت الحكومة بالنسبه له هي الغول او البعبع, ماتعرفش العيب في مين, انما من خلال نظرتي انا, ان العيب في الشعب, ايوة العيب فينا احنا و عندي بعض الدلائل علي كدة:

في عهد الفراعنه, حكومة الفرعون كانت بتشغل الشعب بالسخرة و كان جنود الفرعون بيمروا في البلاد و يشوفوا مين اللي مش بيشتغل و يجلدوة, و حتي جنود الفرعون كان عليهم رقابة.
في عهد المماليك كان الشعب المصري لا يملك, و اللي فيهم كان يملك كان بيعين وصي علي املاكة يشوف مصالحة, و هو في الخر ياخد فلوس و خلاص, و كانوا بيتهربوا من الضرائب و الزكاة.
في عهد محمد علي, كان اصحاب الاملاك بيجلدوا الفلاحين مرة في الشهر عشان يشتغلوا, و كانوا بيشغلوهم بالعين الحمرا.
في عصرنا الان, لو مفيش رقابة من الحكومة علي حاجة, هتلاقي كل مصري يدعبس يدور ازاي يتفلسف و يعمل الواد الجامد اللي بيكسر القوانين...

و من الكلام ده, نستنتج ان العيب فينا, و ان الله لا يغير ما بقوم حتي يغيروا ما بأنفسهم, و نستنتج اننا شعب مصر, مش بنيجي غير بالعين الحمرا...
بس كلمه حق اخيره تتقال في حقنا, المصري لو مشاعرة الوطنيه التهبت, هيتحول من فار همدان لأسد همام, و لو وجد من يتبعه هيضحي بنفسة عشانه, لأنه بطبعه تابع...و ده رأي شخصي

و انـــــــت رأيــــــــك ايـــــه ؟ ؟ ؟ ؟

التسميات: masr el balad, second