|
|
|
||
|
|
العدد الخامس - الخميس 15/11/2007
|
انا مش معاهم و لا معاكوا اول مرة عرفتهم فيها كانت في الجامعة ...قبل كده كنت ببصلهم على انهم زي ما بشوف في التلفزيون و اقرا - في الجرايد الحكومية طبعا – كائنات غريبة او نوعية عجيبة من البشر ... بصراحة الجامعة كانت بداية تغييري لحكمي المسبق عنهم ... كنت فاكراهم انهم كلهم بدقن و جلباب او حتى بنطلون قماش و البنات بنقاب مش بياكلوا غير الرز بلبن و مبيكلموش حد غير بالفصحى و يقولولك يا اخي و يا اختي ...اكيد عرفتوهم ... ايوة هما الاخوان. بصراحة اللي شفتهم في الجامعة ناس عادية جدا ... ناس شبهي انا و اصحابي ... بيلبسوا جينز و معاهم موبايلات و لاب توب و مش كلهم بدقن و لا حاجة و البنات لابسين حجاب طويل شوية  بس برده لابسين على الموضة ... اما بقى من حيث الكلام فكلامهم عادي جدا و روش كمان... انا مش هتكلم على فكرهم دلوقتي لان ده فكرهم و هما احرار فيه... و بصراحة حوار فكرهم و مبادئهم ده اللي يتكلم فيه اكيد واحد فاضي لان كل واحد حر في فكره و مبادئه و مفيش حد له عنده حاجة... اسلامي اشتراكي بتنجاني كل واحد حر...يبقى ليه الهيصة دي كلها عليهم... و ليه هما جماعة محظورة... الاخوان لهم قاعدة عريضة من الجماهير و محدش يقدر ينكر ان ليهم شعبية كبيرة اوى... اللي ينكر ده يبقى مش عايش في البلد اصلا... و برغم انهم جماعة محظورة و بيتم اعتقالهم و مصادرة ممتلكاتهم و كل الحوارات دي لكن برده الجماهير المتعاطفة معاهم بتزيد مش بتقل... و ده يجيبنا لموضوع تاني كل واحد عارف ان سياسة الممنوع مرغوب ان تضييق الخناق على الجماعة مش بيضعفها و يفتتها لان فعلا لها جمهور كبير و جذورها قديمة جدا ... يعني 80 سنة استحالة تمسحهم حملة اعتقالات او استقصاد او سحل زي ما الناس بتسميه لان ببساطة من المباديء اللي الاخوان مؤمنين بيها انهم في ابتلاء و انهم ممتحنين من ربنا و كلام كبير كده يعني كل اللي بيتعمل فيهم مش هيقضي عليهم بالعكس ده هيكون في صالحهم اكتر... قول ازاى الناس دلوقتي الطيبة اللي زي حالاتك كده و قرفانة من عيشتها و شايفة ان الحكومة هي السبب في كل حاجة... الناس دول لما يشوفوا الحكومة دي بتعامل ناس معينة بالطريقة دي و الناس دول برده يشوفوهم في التلفزيون يقولوا احنا عاوزين العدل و عاوزين و عاوزين... متخيل الناس هتنحاز لاي صف؟!... اكيد عارف دلوقتي... طب كمان لو عرفت ان الاخواني نفسه شايف انه كل مايتعرض لمضايقات من الدولة ده بيزود من ميزان حسناته و يدخله الجنة يبقى تتخيل انه ممكن يرجع كلامه؟!.. يبقى اللي بيحصل ان الاخوان مش بيقلوا لا دول بيزيدوا.... المفروض اننا نسيبهم هما و غيرهم يقولوا اللي هما عاوزينه... عاوزين يعملوا حزب.. و ماله ما يعملوا... عاوزين يترشحوا في الانتخابات و ماله برده.... هما خطر على البلد؟!... طب مانسيب الناس هي اللي تقرر ده.... كل الكلام دلوقتي ان الاخوان لو مسكوا الحكم هيرجعونا لعصور الظلمات هيكونوا خطر على المواطنة و حقوق المرأة و هيضربوا السياحة و الاقتصاد و السياسة الخارجية.... و كله كوم و خطر الاسلاميين ده كوم تاني كل ما حد يتكلم عن الاخوان و السلطة يمسكوله في موضوع حماس و الحرب الاهلية و الارهاب... اكننا كل حاجة متظبطة عندنا و الحياة بيس على الاخر و كلها تسامح و اول ما لااخوان مايمسكوا الحكم هيقلبوها افغانستان ايام طالبان... انا مش بدافع عنهم و مش معنى كلامي انى عاوزة الاخوان يمسكوا الحكم... و مش معنى كلامي برده انى مش عاوزاهم يمسكوا... الخطوة اللي اخدها الاخوان في تحويلهم لجزب دي خطوة جامدة... لكن في نفس الوقت محتاجة لتظبيطات... الاخوان لسه محددوش موقفهم من الدولة اللي عاوزينها... شوية يقولوا مدنية و شوية يقولوا عاوزين مجلس يشرف على الحكم حاجة زي رجال دين كده... شوية يقولوا انهم مرحبين بالمواطنة و شوية يقولوا ان مينفعش قبطي يكون رئيس دولة.... التناقضات دي مش بس في برنامج الحزب اللي طرحوه في المصري اليوم لا ده كمان في تصريحات القيادات نفسها... الاخوان دلوقتي منقسمين داخليا...فيه محافظين عاوزين يتمسكوا بادبيات الأخوان و تعاليم حسن البنا و سيد قطب و غيرهم من مفكرين الاخوان و فيه ناس تانية عاوزة تجدد في الجماعة و هما منتقدين من قيادات الجماعة... الاخوان بشكل عام كتنظيم شعبي مش بطال و ياريت باقي الاحزاب تتعلم منه و يبقى ليها نص شعبيته... اما بقى تسييس الجماعة و مواقفها السياسية بصفة عامة محتاجة عمرة... اذا قدر الاخوان انهم يظبطوا الخلافات الداخلية بتاعتهم و يوحدوا خطابهم مع الناس و يتكلموا كلام منطقي و مدروس ممكن ساعتها يبقوا قوة حقيقية مؤثرة على الساحة السياسية في مصر ساعتها باقي لااحزاب لازم تخاف منهم... ...Youmna Yasser التسميات: Fel le3ba |
||
|
|
||
|
 |
|
الـــغـــلاف احـنـا الـشبـاب كـلام جـمـيــل مــصــر الـبـلـد فـي اللعـبـة فــــي الــفــن مـــع الــلــه Banat X Banat في الملعب ولاد مــصــر كلام ميتنسيش English |
|
|
|
كــلـمـنـا |
|
|
|
|
|
|
