 بمناسبة انتصارات اكتوبر فكرت انى اعمل موضوع عن المناسبة السعيدة دي... بس لما سمعت عن احداث العريش الاخيرة رجعت في كلامي.... اللي حصل في العريش فتح ملف عمره ماتقفل و لا هيتقفل لو فضلنا نتعامل معاه بنفس الطريقة دي على طول....
ملف سينا... ايوة ملف سينا مستغرب ليه
الوضع في سينا متأزم جدا... الناس تعبانة اوى.... هتلاقيها منين و لا منين....الدولة بتبص لاهل سينا على انهم خونة و تجار مخدرات و سلاح...و بتعاملهم على الاساس ده...
اهل سينا اللي لولاهم مكناش هناخد كل سنة يوم 25 ابريل اجازة و نفضل نقول سينا رجعت حرة لينا و مصر اليوم في عيد.... اهل سينا قدموا كتير جدا للبلد عشان يحرروا الارض.... واحد زي محمود السوراكة اللي قضى اكتر من 20 في السجون الاسرائيلية بسبب العمليات اللي كان بيعمها ضد اسرائيل و زي ما قال كان بيلعب اسرائيل على الشناكل و لما قالوله نبدلك بالجاسوس المشهور عزام عزام قالهم انا استحمل السجن لكن مترجعوش الجاسوس ده بلدكم.... الراجل ده و غيره ضحوا عشان يحرروا الارض... و احنا بنكافئهم بعد ده كله بايه؟!!
لما واحد من قبيلة السواركة يتسلل لاسرائيل عشان يشتغل فيها... و واحد تاني يتاجر في السلاح....مين اللي وصلهم لكده؟؟!!
اللي اعرفه كويس ان وحدة القبيلة و العشيرة في سينا غيرنا خالص... الواحد بيفتخر بقبيلته و ممكن تعرف الواحد منهم اخلاقه عاملة ازاى لو عرفت مين عشيرته.... يبقى ايه اللي يخلي واحد وطنى زي ده عاش عمره كله بيحارب اسرائيل....ازاى واحد من قرايبه يحاول يدخل اسرائيل يشتغل فيها؟!! اكيد فيه حاجة غلط...
ايه اللي وصل ناس كانوا بيحاربوا عشان يرجعوا ارضهم لانهم يفجروا اماكن سياحية و يتاجروا في السلاح و البلاوي دي؟!!
السبب اكيد في كلمة واحدة ... الاهمال... الاهمال هو اللي عامل فيهم كده...الاهمال هو اللي مش محسسهم بالانتماء ...
المشاريع التنموية العملاقة اللي بنسمع عنها كلها كلام في كلام...مفيش حاجة منها على ارض الواقع...و التنمية مش بتحصل غير في شرم او دهب و ياريتهم بيشغلوا بدو سينا في المشاريع دي لكن اللي بيشتغلوا فيها شباب من القاهرة و الوجه البحري او ممكن القبلي...يعني عندهم بطالة كبيرة جدا... و مفيش اي تنمية بتحصل هناك... و عندهم مشكلة في ملكية الاراضي مش بيمتكلوا الاراضي يعني.... مفيش جامعة حكومية واحدة في سينا كلها...و اقرب واحدة في السويس.... الناس غلابة و مش لاقية تاكل.... منتظر منهم بعد ده كله ايه؟!!
شباب مش لاقية شغل اكيد سهل حد يضحك عليهم و يخليهم يفجروا الناس... ناس مش لاقية تاكل و مش ممتلكة ارضها طبعا هيتاجروا في المخدرات و السلاح و يسافروا اي بلد يلاقوا رزقهم فيها... اهمال الدولة ليهم مش محسسهم بالانتماء ليها.... هو انت ممكن تنمتي لحد متعرفوش؟..الشباب هنا بيتعلم على حساب الدولة لحد الجامعة و اهله بيشتغلوا و بيصرافوا عليه و عنده الشقة بتاعة اهله ساكن فيها بس لما مبيلاقيش شغل يقلك مش حاسس بانتماء للبلد و يسافر بره...طيب تخيل واحد معندوش حتى الحاجات دي...هينتمي ازاى؟!!
و الله انا بسال نفسي هو احنا ليه حاربنا اصلا عشان نرجع سينا... ليه جدي و جدك ماتوا عشان ارض احنا مش بنستفيد بيها غير باسبوع و لا اتنين نقضيهم في شرم.... ليه خسرنا الدول العربية بعد معاهدة السلام عشان نرجعها و احنا بنعامل الناس اللي فيها بالشكل ده... بعد 20 سنة من رجوع سينا حرة لينا و مصر اللي بقت عيد عايزة اسال سؤال...
هو احنا كنا محتاجين سينا دي اوى ليه كده و خسرنا حاجات كتير عشانها و الحال فيها عامل كده؟؟؟
تفتكر ابطالنا العظام اللي ضحوا بحياتهم عشانها لو عارفين الوضع عامل ازاى دلوقتي كانوا فعلا هيضحوا بحياتهم؟؟
...Youmna Yasser التسميات: masr el balad, third |
