ثانيا: قــــــــــانــون الــمـبـــانــــــي فـــي بـــــلادي

فى بلادي لا تُزال المباني المخالفة بل توصل لها المراق طبعاً بعد دفع الغرامة ( و دي غرامة لزوم رفع العتاب)

في بلادي اسيغنينا عن الجراجات المقامة تحت العمارات-حولناها إلى محلات و قهاوي و مخازن اما السيارات فلها الشارع تمشي فية ولا توقف هيا حرة

في بلادي لا يتم استصلاح مزيد من الأراضي للزراعة بل يتم تبوير الأراضي الزراعية للبناء عليها و الخطة بسيطة خالص اذا كان عندك ارض زراعية عاوز تحولها مباني اتبرع بجزء في وسطها لبناء مدرسة أو مسجد و ياريت تبنيهم و تخلص نفسك تلقائي باقى الأرض المحيطة هتتحول بقدرة قادر إلى اراضي مباني بالشئ الفلاني ولا زرع و لا وجع دماغ

بلادي هي الوحيدة التي تحترم العشوائيات ( ولمن لا يعرف العشوائيات هي مباني اقيمت بالمخالفة لقانون التخطيط العمراني و تقسيم الأراضي) عندنا اصدرنا لهم قوانين لتصحيح الأوضاع 4 مرات اعوام (96 و 81 و 95 واخيراً 2007) وواضح ان كل ما نلاقي عشوائيات هنغمض عنينا و نقول معلش المرة دي

في بلادي المالك ياخد رخصة بناء مثلاً خمسة ادوار لازم يبني عشرة (الراجل بيحل مشكلة الإسكان بمعرفتة) و برضة بلادي الحنينة توصله المرافق للعشرة بصرف النظر عن عرض الشارع او طاقة المرافق

في بلادي فيه تعايش سلمي يعني في العمارة الوحدة تلاقي مصنع شغال عال العال في بير السلم و كافيه شيك على السطوح ومحلات ومكاتب وبرضه سكان كل ده في عمارة واحدة كمان ممكن يبقي الدور الاول حلواني ولافرن ولامطعم والباقي سكان وسلم لي علي الأمن الصناعي اللي مش بنفتكره غير بعد كل حريقه

في بلادي بيفكرو حديثاً يفرضو ضرايب على العقارات الشاغرة و المدن الجديدة و الساحل الشمالي وطبعاً الضرايب دي هتفرض على المباني اللي مبنية في السليم اما العشوائيات طبعاً مش هتدفع ضرايب لأن دي عشوائيات يا جماعة لكن المباني اللي ورقها سليم و اساسها متين وشكلها جميل لازم تدفع

في بلادي يمنح اعضاء مجلس الشعب من رجال الأعمال مساحات شاسعة من الأراضي بأقل من نصف ثمنها مع انهم يقدرو يدفعو ضعف تمنها ولا حسد بصرف النظر عن ان الفرق في الثمن هو حق طبيعي لباقي مواطنينا و مع ذالك خطة تبوير الأراضي الزراعية السابق شرحها هما اللي ابتدعوها طبعاً بعد الحصول على الحصانة

بمناسبة الحصانة عندنا حكاية مسلية قبل النوم تقول:"انة كان هناك وزير سابق للإسكان طويل اللسان ينوي ردم جزء من نهر الشريان لبناء معرفش آيه لعلية الأقوام وطول ما الوزير في الوزارة محدش قادر يفتح بقه و يقول يا جماعة حرام نردم نهر الشريان الذي من علينا به الرحمن وفعلاً كنا على وشك التنفيذ بإتقان لولا رحمة الله بالبلاد و العباد واستبعاد الوزير من الوزارة لكن بعد أن حصل على الحصانة حتى لا يسئل من أي مخلوق كان والسلام"

يبقى أن أقول لكم إن بلادي اكيد مش مصر لأن مصر دي أم الدنيا و أهلها أجدع ناس