المرة اللي فاتت اتكلمت عن الحياة الحزبية المهلبية في جمهورية مصر العربية... و اتضح ان مفيش حزب يسد في البلد... و قبل ماتفهم غلط هقلكوا فصدي ايه... الهدف من التعددية الحزبية بصفة عامة ان يكون فيه تداول للسلطة... زي امريكا مثلا مرة يمسك البلد جمهوري و مرة ديموقراطي مش دايما مرة و مرة بس الرؤساء بتوعهم عمرهم ما كانوا كلهم من حزب واحد...
احنا بقى فيه حزب عندنا يقدر يتداول السلطة... بلاش الرياسة ممكن تلاقي ناس بيترشحوا للانتخابات الرياسية عادي بتحصل... لكن لو افترضنا ان واحد منهم مسك و الحزب بتاعه بقى حزب حاكم ياترى هيلاقي كوادر كافية عشان يعمل بيها حكومة.... و يقدر يكونله اغلبية في مجلس الشعب و الشورى.... فهمتوا قصدي ايه؟....
عشان كده متلاقيش حزب يسد و الناس كمان فهمت الفولة فشايلة حوار الاحزاب ده من دماغها... بس مؤخرا ظهرت حركات شعبية على الساحة بدأت تتكلم في حاجات جديدة و شدت الناس ليها... اشهر حركة هي حركة كفاية....
شهرة حركة كفاية جت من اسمها... كفاية... الكلمة اللي كل واحد نفسه يقولها من زمان بس مكنش عنده الجرأة الكافيه عشان يقولها... و لما لقى حد بيقولها مسك فيه زي الغريق اللي بيتعلق في قشاية....
و زي ما اسمها شد الناس كمان كلامها شدهم.... كفاية فساد كفاية تعذيب كفاية احتكار كفاية كفاية....من كام سنة فاتت الناس مكنتش تقدر تفكر مجرد تفكير انها تقول الكلام ده في العلن.... طول عمرهم بيقولوه بس بينهم و بين بعض.... الناس مليانة و قرفانة و هتفرقع....اول مالقوا ان فيه حد بيقول اللي بيقولوه ده في الصحافة و التلفزيون مصدقوا يروحولوا.... سر نجاح او بلاش نجاح نقول شهرة حركة كفاية كان احساس الناس بأن خلاص بقى كده كفاية.... الناس كانوا قربوا ينفجروا من اللي جواهم يمكن ده اللي شهرها مش اكتر... الناس ماراحوش لكفاية عشان قياداتها البارزة و لا املهم فيها انها تغير الاوضاع او اي حاجة من دي... الناس راحولها عشان يفشوا غلهم و خلاص....


و ده يجيبنا لنقطة تانية... كفاية عملت ايه بالظبط؟!!... مسمعناش عن اي انجاز عملته كفاية لاعضائها او للشعب اللي المفروض انها بتدافع عنه... كل اللي عملته انها ودت الناس السجن عشان بيشاركوا في مظاهراتها... كفاية مدتش الناس اي حاجة غير الفرصة انهم يقولوا كفاية... بس كفاية... انا طول عمري بقول ان الواحد لازم يغير الاوضاع اللي مش عاجباه بنفسه و البلد هتتصلح و لو مقدرتش تغير حاجة على الاقل طالب بحقك في التغيير او على الاقل اعترض و سمع الناس صوتك... طول عمري مؤمنة بده... لكن اللي بتعمله كفاية مش كفاية ابدا.... بتقولوا كفاية و معترضين طيب ماتورونا انتوا عاوزين ايه... معترضين على الفساد طيب ماتقولوا اقتراحاتكوا عشان البلد تتصلح...كفاية كفاية بس...
الناس كانت ملمومة حوالين كفاية في الاول عشان كانت بالنسبة ليها حاجة جديدة فرحانين بيها... اول مرة يقدروا يقولوا كفاية... بس دلوقتي خلاص الناس اتعودت على الكلمة و خلاص قِدمت... معتقدش انهم هيفضلوا ماشيين ورا كفاية على طول... الطفل الصغير اللي فرحان باللعبة الجديدة خلاص زهق منها و عاوز غيرها... اللي عملته كفاية انها ادت للناس امل بس للاسف قريب اوى هايشوفوا الامل ده هيودي لفين.... صحيح الناس المفروض انها تعرف اللي بيحصل حواليها بس بعد ماعرفوا ايه اللي حصل... جالهم احباط جالهم قرف جالهم اكتئاب.... لو كفاية فعلا معمولة عشان تحارب الفساد و تخدم الناس اعتقد ان جه دورها دلوقتي انها تقدم للناس حلول و تنقذهم من الضياع اللي هيبقوا فيه.... لو كفاية مطورتش من نفسها قريب الناس هتعرف ان كل ده كان اشتغالة و مفيش منها فايدة و انها بُق على الفاضي... قريب اوى هتلاقي الناس بتقول كفاية "كفاية"....